بسم الله الرحمن الرحيم

موضوع لحل جميع مشاكل تابت ساري ماكس (Sary Max)

هتكلم عن تجربه شخصيه ليا مع تابلت ساري ماكس اللي هو يعتبر اعلي فئه نزلت في فئة التابلت من شركة ساري

بصراحه الجهاز حلو في الاداء بتاعه مقارنة بسعره بس المشكله اللي قابلتني لما حاولت اغير نسخة الويندوز اللي بتيجي معاه اني بعد ما غيرتها لقيت ان الجهاز مالهوش دعم خالص علي النت ولا في موقع رسمي للشركه تقدر تنزل من عليه التعريفات بتاعته وطبعا بعد ماحاولت كتير اني اوفقله تعريفات تشغله في حاجات اشتغلت وحاجات مكنش ليها اي حل زي مشكلة تعريف الصوت ومشكلة تعريف التاتش المعكوس 

ولما حاولت اشوف تجارب الناس مع الضمان لقيت انهم بياخدوا فلوس كتير جدا عشان يشغلوه تاني حتي لو كان في فترة الضمان وطبعا ده يدل علي ان شركة ساري شركه محتكره وعشان كده لما وصلت لحل حبيت اشاركه مع الناس اللي عندها نفس المشكله دي

الحل ببساطه اني جمعت التعريفات والبرامج اللي محتكراها شركة ساري واللي بتتسطب تلقائي بعد تسطيب نسخه الويندوز من جهاز تاني شغال بنسخته الاصليه

مش عاوز اطول عليكوا وندخل في الشرح علي طول

اولا: جهز الحاجات دي

     1- فلاشة مساحتها 8 جيجا

     2- حمل ملف الريكفري من اللينك ده Sary Max Recovery

بعد ماتحمل النسخه شامله الريكفري من اللينك هتركب الفلاشه وتفرمتها علي نظام fat32 ودوس علي Restore device defaults وسميها Recovery زي الصوره دي

بكده نبقي جهزنا الفلاشة وخلصنا اول خطوه نيجي بعد كده للملف اللي حملناه هو تقريبا مساحته 3 جيجا وشويه هو كبير لانه شامل نسخة ويندوز والريكفري بتاع الجهاز 

المهم بعد ماتحمله فك الضغط بتاعه هيطلعلك فولدر اسمه ريكفري هتاخد كل اللي في الفولدر وتحطه جوا الفلاشه (ملحوظه مهمه متاخدش الفولدر نفسه من برا) يعني افتح الفولدر وانقل محتوياته 

بعد كده المفروض دلوقت ان معاك فلاشه اسمها RECOVERY ولما تفتحها هتلاقي المحتويات زي الصوره دي

ثانيا: وده المهم

هتقفل الجهاز خالص shutdown

هتشغله تاني وتدخل علي الBIOS ( يعني اول مالجهاز ينور ويكتب كلمه SARY دوس علي زرار Delete كذا مره ) لحد ماتظهر الشاشه دي

لو الكيبورد ضايع او مش شغال ممكن تستخدم كيبورد USB عادي

حرك بالسهم يمين لحد ماتوصل لقائمة BOOT زي الصوره دي واتأكد ان 

الFast Boot مظبوط علي Disabled 

وارجع بعد كده علي قائمة Security واختار Secure boot menu  اللي تحت واتاكد برضه ان Secure Boot معموله علي Disabled

بعد كده روح علي قائمة Save & Exit هتلاقي الفلاشه ظاهره في اختيارات البووت من تحت واسمها هيكون علي حسب نوع الفلاشه بتاعتك زي الصوره دي

ومن هنا هيبدأ يبوت من الفلاشه بس لازم تكون عارف ان كل حاجه هتتمسح والجهاز هيرجه كأنه لسه طالع من الشركه عشان كده لو عاوز تاخد حاجه من عليه خدها قبل ماتكمل الخطوات الجايه دي

نكمل موضوعنا

دي اول صوره هتظهر معاك

اختار US  وكمل معايا بالانجلش ولو عاوزه عربي ابقي رجعه من الضبط بعد ما الجهاز يخلص

بعد كده اختار Troubleshoot زي الصوره دي

وبعد كده Recover from a drive

بعد كده Just recover my files زي الصوره دي+

ودي اخر حاجه هتعملها

دلوقت سيب الجهاز يحمل ومتحركش الفلاشه وهياخد وقت شويه لحد مايخلص 

اول مالجهاز يخلص هيفتح عادي وهتكون كل حاجه شغاله من غير ماتحتاج تعريفات ولا اي حاجه

لما الجهاز يشتغل معاك متنسانيش تدعيلي دعوه حلوه ليا ولوالديا والمسلمين اجمعين